කුමරියකගේ ස්වයංවරය

දස දිසාවෙන් පැමිණි
බලය තේජස සපිරි
මාලිගා මුතු මැණික්
දැසි දසුන් හා තවත්
නේක වරදාන පිරි
කුමරුවන් සිටී ඔබෙ
අතපතා දියණියෙනි

පියතුමනි මේ කිසිත්
මට අගේ නැත තවත්
එකම වරයක් දෙන්න
ස්වයංවර උලෙලෙදී

මගේ සිත කවියක්ය
ඒ කවට පෙම් බඳින
කුමරුවෙක් ‍තෝරන්න
ඉඳින් අවසර දෙන්න

පවසන්න ඔවුන් හට
මා නමින් පබඳින්න
දිනට එක බැගින් වන
කවි ගීත දහසක්ම

මා නමින් කවි ලියන
සොඳුරු කවියාම මට
‍තෝරන්න ඉඩ දෙන්න
මගේ හිමියන් ලෙසට