"හිත රිදුන දසුනක්"

ආගමික නායකයන් හැම කෙනෙක්ම ඒ ඒ ආගම් අදහන පුද්ගලයන් විසින් උතුම් කොට සලකන්නේ ඒ හැම ආගමික නායකයෙක්ම මිනිස් පරපුර වෙනුවෙන් යම් මිල කළ නොහැකි මෙහෙයක් කොට තියන නිසා බව කවුරුත් දන්න කාරනයක්. ඉතින් ඒ නිසාම අපේ රටේදි සංඝ සමාජය තුල මොන තරම් අකටයුතු කම් සිදු වුනත් ගෞතම බුදුන්වහන්සේ වෙනුවෙන් අපේ හිත් තුල ඇති භක්තිය කුමන ලෙසකින් වත් අඩු වන්නේ නැහැ.
ලෝකයේ කාලෙන් කාලෙට අසංවේදී මිනිසුන් අතින් අපි දන්න බොහෝ ආගමික නායකයන්ට අගරු වන ආකාරයේ කටයුතු සිදුවුනා. සමහර අන්තගාමී අය අතින් මේ හේතු නිසා බොහෝ කැළඹිලිත් ඇතිවුනා. සමහර අවස්ථාවල මට හිතුන දෙයක් තමයි මේ ආගමික නායකයන් ඇත්තටම මේ සිදුවීම් වන විට ජීවත්ව සිටියා නම් මෙවැනි දේ සිහින් සිනහවකින් බැහැර කරනු ඇති කියා. හේතුව බුදුන් වහන්සේ ජීවත්ව සිටින කාලයේත් එතුමා අපකීර්තියට පත් කරනු පිනිස චිංචිමානවිකාව සහ දෙව්දත් වගේ අය අතින් බොහෝ දේ සිදුවුනත් එතුමා ඒ සියල්ල නිහඬ මුවින් ඉවසා සිටි නිසයි. ඉතින් මේ වැල් වටාරම් කුමක් සඳහාදැයි ඔබ සිතනු ඇති. බලන්න පහත පින්තූරය:

තව කෙනෙකුගේ ආරාධනාවක් මත මට ලඟකදි යන්න ලැබුනා East Side Mario's නමින් හඳුන්වන resturant  එකකට දහවල් කෑම සඳහා. අපි දහ දෙනෙක් එක මේසයක් වටා හිඳගෙන සතු‍ටු සාමිචියේ යෙදෙමින් ඉන්න විට වේටර් වරිය පැමිණ මෙනූ පත පිළිගැන්නුවා. මෙනූ පත දු‍ටු විගස මගේ නෙත ගියේ හිත කකියවන වචන පෙලක් දෙසට. තිගැස්මක්. ඒ මෙනූ පතේ ඡායාරූපයක් තමා ඔය උඩින් තියෙන්නේ.
එම දසුන හිත සසල කළ නිසාම අන්තර් ජාලය පීරා මේ ගැන  සොයන්නට මට සිතුනි. මට ලැබුන තොරතුරු අනුව මේ භෝජනාගාරය ඉතාලි ඇමරිකානු ආහාර සඳහා විශේෂිත වන අතර ඔවුන් සඳහන් කරන ආකාරයට 2010 දී ඔවුන් නිපදවූ ප්‍රචාරක වීඩියෝ පටයෙහි ඇති  "Hey, budda boom budda bing" යන පාඨය නිසා මිනිසුන් අතර එය බොහෝ ප්‍රචලිත වී ඇතැයි කියනු ලැබේ.
 "The restaurant specializes in Italian-American cuisine. People are most familiar with the restaurant's long running jingle featuring the catch phrase: "Hey, budda boom budda bing". The song is demonstrated in the making-of video for the 2010 advertisement."
මේ පිලිබඳව තවදුරටත් සොයා බැලීමේදී  මට එක් වීඩියෝ පටයක්ද සොයා ගැනීමට හැකිවිය.
 "EAST SIDE MARIO'S "BUDDA BOOM BUDDA CHING" 2011 CONTEST  http://www.youtube.com/watch?v=CeUW-eC9Tyk"
මීට අමතරව නවසීලන්තයේ ඕක්ලන්ඩ් නගරයේ Monsoon Poon, Asian Restaurant හි පහත සඳහන් ආකාරයට මේ නමින්ම කොක්ටේල් එකක් පිරිනමන බව සඳහන් කොට තිබුනි.
"The décor is warm and welcoming, and there's a nice bar to sit at if you have to wait for a table.  Why not try their ‘Buddha Bing Buddha Boom‘ cocktail or after your meal try the ‘Feng Shui' dessert cocktail - winter berries, manuka honey, pomegranate molasses, chambord, bacardi razz & limón all cocktails intended ‘to make ladies smile and boys strong'..."
"බුද්ධ" යන වචනය හැර මේ කිසිම තැනක බුදුන් වහන්සේගේ ඡායාරූපයක් ඔවුන් භාවිතා කොට ඇති බවක් මගේ ඇසට හසු වුනේ නැත. එහෙත් මට කුතුහලය දැනවූ කාරනය වූයේ මෙම වචනය ඔවුන් කුමන අරුතකින් භාවිතා කළාද යන්නයි. "බුද්ධ" යන වචනයට අපි අනුපමේය අගයක් දෙන බැවින් මේ සිදුවීමේදී මගේ සිත සසල වුවද අවසන එය ඔවුන් තුල එතරම් හැඟීමක් ඇති නොකරන නිකම්ම නිකම් වචනයක් පමණක් වන්නට ඇතැයි මට සිතුනි. වචනයකට එක් එක් අය ලබාදෙන අරුත් අනුව හැඟිම් වල වෙනසක් ඇති වුවද වචන යනු අකුරු ඇමුනුම් පමණක් බව අවසන මට සිතිනි. එබැවින් මේ  සටහන ගැන අන්තගාමී ඇසකින් නොබලනු ඇතැයි මම සිතමි.