මගේ දෙවියන්

මගේ හැම සැප දුකම සම සිතින්        දරමිනා
සෙවනැල්ල වගේ මා පසුපසම      ගැවසෙනා
කඳුළු පිසලන ඇසේ හිතට නිවනක්      වෙනා
වෙන කවුද ඔබම හැර දෙවියන්ව   ගැවසෙනා

අපහාස උපහාස සුළඟ සැඩ වෙස්         අරන්
වියරු වෙයි විටෙක හිත් අහස දෙවනත් කරන්
දනිමි මේ ලොව එකම එක හිතක් මා   නමින්
පවතිනා බව බියක් කුමට වනුදෝ       ඉතින්

ගිලන්වී සිටින කල නිදි නැතිව මා      රකින
වරදකට කිසි විටක ඉඩක් හසරක්   නොදෙන
ඔය දෑස මා යනෙන සියළු මඟ තනි    රකින
දයාබර මවුනි ඔබ දෙවියන්ය මට       සිටින