"චීන කෑම සමඟ කළු හාලේ බත්"

Chines Restaurants වලින් කෑම කන්න ඉතින් වැඩි දෙනෙක් කැමතියිනේ. ලඟකදි ඉඳල මටත් දිනපතා මේ චීන කෑම රස බලන්න ඉඩක් ලැබිල තියනවා. ඉන්දියන් සාගරයයි අත්ලන්තික් සාගරයයි පහු කරගෙන ඇවිත් අන්තිමට මම වැ‍ටුනෙ චීනෙට. ප්‍රශ්නයක් තමයි. අත්ලන්තික් වෙනුවට යන්න ඕනෙ පැසිපික් සාගරය උඩින්නෙ. මන්දා මට නම් වුනේ ඉතින් ඒක. හේතුව මට අන්තිමට ඉන්න වුනේ චීන මිතුරියන් පිරිසක් එක්ක. ඉතින් දවසින් වැඩි කොටසක් මට ඇහෙන්නෙ චෑං චූං විතරයි. ඒත් ඉතින් පෙරලුන පිට තමයි හොඳම කියල අර ඔරුවක් පෙරලුනාට පස්සෙ ඔරුවෙ ගිය කෙනා කිව්ව වගේ මමත් හිතුවා මේක තමයි හොඳම අවස්ථාව චීන කෑම හදන්න ඉගෙන ගන්න කියල. ලංකාවට ඇවිත් ඉතින් Chines Restaurant එකක්වත් දාගන්න බැරියැ නේද?   ඉතින් මගේ චීන මිතුරියො ටික කෑම උයන වෙලාවට දහසක් ප්‍රශ්න අසමින් මේ කෑම හදන විදිය ඉගෙන ගන්න මම උත්සාහ කරනවා.
උඩින්ම තියෙන පින්තූරයෙ තියෙන්නෙ කළු හාල්. මම නම් එදා තමයි මුල්වරට දැක්කෙ. වඩා හොඳින් වෙනස හඳුන ගන්න සුදු හාල් ටිකකුත් සමඟම පින්තූරය ගත්තා. 

කළු හාල් බත් උයන්නෙ නම් අපි උයන විදියටම තමයි. සුදුද කළුද කියල වෙනසක් නැහැ.

මේ අය චීනෙන් ගෙනා කළු පාට වේලපු හතු වගයක් උයනවා. මුලින් ඒවා හොඳින් පෙ‍ඟෙන්න දානවා. ඉන් පසුව තෙල් ටිකක් රත් වෙන්න තියල ඒකට ගම්මිරිස් කුඩු ටිකක්, තලාගත් සුදුලූනු බික් දෙකක්, කරල් මිරිස් දෙකක් පමන, මිරිස් කුඩු ටිකක්, විනාකිරි, ලුනු සහ සෝයා සෝස් එකතු කරනවා. ඉන්පසුව අර හොඳින් පෙඟුන හතු වතුර බේරා අරන් ඒ මිශ්‍රණයට දානවා. විනාඩි පහකින් පමණ හතු කෑමට සුදානම්. මටත් රස බලන්න දුන්න. අනේ මන්දා ... රසත් තියනවා. ඒත් ඒ හතු ටිකක් රබර් වගේ.
රාබු හදන්නෙ මේ අය අමුතුම විදියකට. රාබු ගෙඩිය හොඳින් පොතු හැරල හීනියට කපාගෙන එය රත්වුනු තෙලට දැමූ ලුනු සහ විනාකිරි මිශ්‍රණයකට එකතු කරනවා. එය යන්තමින් තැම්බී එනවිට රාබු කොළද ලොකු කැබලි වලට කපා එයට එක් කරනවා. රාබු වල අමු රසය නැති නොවන සේ එතරම් වේලා තැම්බෙන්න දෙන්නේ නැහැ. ම්.. අමුතුම වෙනස් රසයක්.

ඊලඟට හැදුවේ අර්තාපල් එක්ක අර කලින් කිව්ව කලු හතු. හතු නම් හැදුවේ කලින් විදියටමයි. අර්තාපල් නම් හීනි පෙති කපල ලොකු ලූණු එක්ක තෙලෙන් බැදුනු ලුනු, විනාකිරි, සුදුලූනු සහ සෝයා සෝස් මිශ්‍රණයකට එකතු කරනවා. මේකට මිරිස් දැම්මෙ නැහැ. කෑම වල පාට ලස්සනයි. වෙනස් රසයක්.
ඉතින් ඔය කෑම ජාති කාලා මට නිකම්ම ඉන්න ලැබුනෙ නැහැ. අපේ කෑමත් ඕනෑ කිව්ව නිසා මම ඉතින් අපේ ක්‍රමයට පරිප්පු තෙම්පරාදුවක් හදලා, මල් ගෝවා තෙලට දාලා සුදු බත් හැදුවා. කෑම හැදීම අවසානයේ හැමෝම කන්න ඉඳ ගත්තා. මොකද හිතන්නේ? චීන්නු ටික චීන කෑම පැත්තක තියලා අපේ පරිප්පුව ඉවර වෙනකම්ම බඩ පිරෙන්න බත් කෑවා. දැන් මම උයන්න යන වෙලාවට රහ බලන්න ඇවිත් අන්තිමට මටත් ඉතිරි නොවෙන තැනට වැඩ සිද්ද වෙලා තියෙන්නෙ. මදෑ Chines Restaurant දාන්න හිතා හිටියා. දැන් යන විදියට නම් මට පේන්නෙ Sri Lankan Restaurant එකක් චීනෙ ඇරෙයි වගේ.