"සීතාව වෙමි මම"

රාවණා මහ රජුනි - හිස නමමි මම ඔබට
අනෙකෙකුට අයත් වූ - සිරුර වෙත ලං නොවූ .... !!
මගේ මුළු ආත්මය - ප්‍රේමයෙන් ඔබ වෙතට
එතැයි ඔබ එක සිතින් - බලා සිටි බව දනිමි

ඔබේ හිස රාමගේ - කගපතින් වෙන්ව ගිය
අසුභ හෝරාව තුළ - දැනුණි මට පැහැදිලිව
ආදරය මා පැතූ - ඔබ සතුව තිබුණු බව
රාමාට නොවැටහුනු - මසිත කියවූ බැවින්

සිතක් නැති සිරුර ගෙන - ගියෙමි රාමා සමග ...
රාවණා ...!!  ඔබට මම - දැන් කෙසේ කියන්නද?
මගේ මුළු ආත්මය - ඔබේ මතකය සමඟ
මිහිදන්ව ගිය බවක් - සදාකාලික ලෙසට

රාම ...!! ඔබ මට සැදූ - චිතකයට නගිමි මම
ඔබට හැර මේ සිරුර - අනෙකෙකුට කිසි කලෙක
හිමි නොවූ බව කියා - පෙන්වන්න ලෝකයට
එයද පතිනියකවී - සපථ කළ යුතු ලොවට?